Gabay sa mga Kontribyutor

Ang DIWA ay isang refereed, libre, at open-access na e-journal ng Pambansang Samahan sa Sikolohiyang Pilipino (PSSP). Naglalayon ang journal na maglathala ng mga makabuluhan at makatuturang pag-aaral sa Sikolohiyang Pilipino (SP) na nagsusuri at umuunawa sa diwa at pagkataong Pilipino mula sa oryentasyon at perspektibong Pilipino tungo sa pagpapalawak ng pambansang kamalayan at kamulatan ng sambayanang Pilipino.

Inaanyayahan ang mga iskolar, gradwadong at di-gradwadong mag-aaral, guro, mananaliksik, at propesyunal mula sa agham panlipunan, humanidades, pilosopiya, siyensya, at mga kaakibat na disiplina na magsumite ng kanilang kontribusyon sa DIWA 9 at DIWA 10. 

Mga Uri ng Kontribusyon

  • Pananaliksik (empirikal na pananaliksik, teoretikal na pagsusuri, o sistematikong rebyu ng pananaliksik): 8–10 pahina (single-spaced) [bukod pa sa mga larawan at ilustrasyon]
  • Rebyu ng aklat, palabas, pelikula, o sining biswal: 2–5 pahina (single-spaced)
  • Panayam sa mga iskolar tungkol sa iba’t ibang paksa kaugnay ng Sikolohiyang Pilipino: 8–10 pahina (single-spaced)
  • Liham sa patnugutan: Hindi lalampas ng 2 pahina (single-spaced)

Pangkalahatang Panuntunan

  • Nasa wikang Filipino ang anumang kontribusyon. 
  • Dalawang magkahiwalay na file ang inaasahan sa mga submission: ang mismong manuskrito at cover letter para sa patnugutan. 
  • Kompyuterisadong manuskrito (single-spaced) sa papel na may sukat na 8.5” x 11” (letter size) at may marjin na 1” sa itaas, ibaba, kaliwa, at kanan.
  • Estilong American Psychological Association (APA) 7th Edition, sa pagkilala, pagsipi, at paghahanda ng bibliograpiya < https://bit.ly/33o5sYp>. 
  • May abstrak (nasa Filipino at may salin sa Ingles) na may 200–300 na salita at maikling tala ukol sa may-akda (bionote) na may 100–200 na salita.
  • Ilan pang gabay: (a) .doc o .docx ng Microsoft Word ang manuskrito, abstrak, at tala ukol sa may-akda; (b) .jpeg o .jpg na 300 dpi para sa mga larawan; (c) font na 12 pt Times New Roman; (d) naka-indent ang bawat talata; (e) nakahanay sa kaliwa ang bawat talata; (f) walang page break; (g) bold na font sa bawat titulo ng mga seksyon; (h) lahat ng talahanayan ay sa hulihang bahagi ng teksto; (i) ang tumbasan ng talahanayan ay nasa itaas samantalang ang mga tala ay nasa ilalim; (j) ang mga ilustrasyon o litrato ay sa hulihang bahagi ng teksto na may legend sa ilalim; (k) ang e-mail address at URL ay nakapaloob sa tatsulok na panaklong (“<” at “>”), at (l) ang mga URL ay dapat pinaikli gamit ang bitly.com

Panuntunan sa Etika ng Pananaliksik

  • Mahalagang bahagi ng pananaliksik sa Sikolohiyang Pilipino ang etikal na pamamaraan. Inaasahang talakayin sa mga empirikal na pananaliksik ang mga hakbang na ginawa ng mananaliksik upang tiyakin ang etikal ang buong proseso.  
  • Hangga’t maaari, inaasahang dumaan ang pananaliksik sa proseso ng pagrebyu at nakatanggap ng ethics clearance mula sa ethics review board. Kung walang naturang clearance, maaaring ipaliwanag ng may-akda ang dahilan para rito (hal., walang ethics review board sa kanilang institusyong kinabibilangan). 

Nilalaman ng Cover Letter

  • Paliwanag ng kaangkupan ng kontribusyon sa tunguhin at layunin ng Diwa
  • Pahayag ukol sa conflict of interest, at kung mayroon, paano ito tinugunan
  • Pahayag na hindi pa naililimbag ang artikulo sa ibang journal, hindi kasalukuyang nirerebyu ang artikulo sa ibang journal, at hindi ito isusumite habang isinasagawa ang proseso ng pag-referee sa Diwa
  • Pahayag tungkol sa authorship, partikular na lahat ng awtor ay sumang-ayong makabilang bilang kontributor, sa pagkakasunod-sunod ng mga pangalan, may sapat na kontribusyon sa pagsusulat ng papel, at sumang-ayon sa isinumiteng bersyon ng papel
  • Pahayag na hindi gumamit ng generative AI sa pagsusulat ng nilalaman ng papel. Kung gumamit man ng AI para ayusin ang pagkakasulat ng papel, banggitin kung ano at paano ito ginamit. 
  • Para sa pananaliksik: Pahayag tungkol sa etikal na pagsasagawa ng pananaliksik, at pagsasailalim sa ethics review, kung mayroong institutional review board sa institusyon kinabibilangan

Proseso ng Pagreferee sa mga Pananaliksik

  • Sa pagsumite ng kanilang kontribusyon, sumasang-ayon ang mga kontribyutor na sumailalim sa proseso ng pagreferee.
  • Matapos matanggap ng patnugutan ang kontribusyon, sasailalim ito sa pangunahing rebyu ng mga tagapatnugot upang tiyakin na angkop ang pananaliksik sa mga layunin ng dyornal at katanggap-tanggap ang kalidad para dumaan sa peer review. Kung hindi ito irerekomendang dumaan sa peer review at ilathala, magbibigay ng mga komento ang mga tagapatnugot sa loob ng isang buwan.
  • Para sa mga papel na naitakda ng mga tagapatnugot na sapat para dumaan sa peer review, tatasahin ng mga referee ang mga pananaliksik ayon sa mga sumusunod na pamantayan: (a) kahalagahan ng pag-aaral; (b) kaparaanan sa pananaliksik; (c) kalidad o kahusayan ng pagkakasulat; at (d) kontribusyon sa Sikolohiyang Pilipino 
  • Batay sa mga komento ng mga referee at tagapatnugot, tatanggap ang mga kontribyutor ng pangkalahatang pagtatasa sa kanilang submisyon na maaaring: (a) mailalathala na; (b) kailangan pa ng rebisyon; at (c) hindi mailalathala. 
  • PARTIKULAR SA DIWA 9 LANG: Para sa mga pananaliksik na kailangan pa ng rebisyon, magkakaroon ng writeshop ang patnugutan upang masuportahan ang mga kontribyutor na matugunan nang sapat ang mga komento. Inaasahang maisusumite ang pinal na manuskrito sa PATNUGUTAN NG DIWA 9 nang hindi lalagpas sa isang buwan matapos ang writeshop.

Ang deadline ng pagsusumite para sa DIWA 9 ay sa Pebrero 28, 2025.  Samantala, ang deadline ng pagsusumite para sa DIWA 10 ay sa Marso 2, 2025.  Ipadala ito at ang kalakip na cover letter sa secretariat@pssp.org.ph.